Humari apni bhaasha maari ja rahi hai,
Angrezi boli nahi jhaadi ja rahi hai;

Ajeeb sa bhoot ho gaya hai sabke sir pe savaar,
Angrezi bolne wala hai dude aur hindi bolne wala hai gavaar;

Ladkiyaan bhi hai badi bechain si,
Angrezi bolne wali hai sexy aur Hindi bolne wali hai behenji;

Angrezi na aane par actors ko nahi milta kaam, unhe badi niraasha hoti hai,
Are expressions ki bhi koi bhaasha hoti hai?

Mai koi gyaata to nahi par ek baat mujhe zaahir hai,
Khiladi vo hota hai jo Angrezi me nahi apne khel me maahir hai;

Ek Hindi letter padhne me hume 1-2 din lag jate hai,
Durgati to ye hai ki hum apni bhaasha me 1-100 tak gin bhi nahi paate hai;

Angrezi  achi bhaasha hai par hindi bhi nahi hai gaali,
Kisi bhaasha ki mahutaj nahi hoti taali;

Koi aur bhaasha seekh ke apni bhaasha ko choti mat teherana,
Angrezi ko kisi cheez ke liye kasauti mat banana;

Angrezi seekho, bolo isme nahi hai koi apradh,
Par kabhi apni bhaasha ko bhool na jana rakhna use bhi humesha yaad;

Hume insaan ko insaan ki khoobiyon pe taulna nahi aata,
Kaamiyaab to vo bhi ho jate hai jinhe bolna tak nahi aata!!!

Poem Credits : Deepak Malhotra

Advertisements